Mokgatlho o ruta bomme

Bomme ba ba tshelang le mogare le ba ba amilweng ke mogare kwa metsaneng e e gaufi le Tsabong, ba amogetse dithutho go tswa mo mokgatlhong wa Bomme Isago Association bosheng.

Fa a bua kwa ithutuntshong ya malatsi a mabedi, Mme Boingotlo Gupta, yo o leng moeteledipele wa lekgotla leo, o tlhalositse fa ba lemogile gore bomme ba ba tshelang ka mogare, segolo jang ba ba nnang mo dikgaolong tse di tshwanang le Kgalagadi, ba tlhaela ka kitso e e tseneletseng ka dikgang tse di amanang le segajaja sa HIV/AIDS.

Mme Gupta o tlhalositse fa ithutuntso e ne e remeletse mo go ruteng bomme ka ditshwanelo tsa tlhakanelo dikobo le botsogo, kgethololo ya ba-na-le-mogare le kgokgontsho ya bomme kwa malwapeng.

A re go neela balwetse diritibatsi fela go le nosi go ka se rarabolole seemo sa AIDS mo lefatsheng mme go le botlhokwa gape gore bomme ba e leng bone thari ya setshaba, ba rutiwe gore ba fetisetse thuto eo kwa go boRre gammogo le bana bone.

A re dikgang tsa bolwetse jwa AIDS di motlhofo e bile di tlhaloganngwa botoka ke bomme ka jalo go ba ruta ka tsone go tsisa pharologanyo mo setshabeng.

Mme Gupta a re mokgatlho wa Bomme Isago o ikemiseditse go kgothatsa bomme ba ba tshelang ka mogare go dirisa sekausu ka dinako tsotlhe fa ba tlhakanela dikobo, go itshireletsa mo megareng e mengwe e e ka gakatsang seemo sa bone le go fokotsa kanamiso ya mogare.

O buile kgatlhanong le bangwe ba ba fetisetsang mogare ka bomo mo go ba bangwe ka ntlha ya kilo le mowa yo o bosula. A re batho ba ba tshelang ka mogare ga ba a tshwanela go fetisetsa mogare kwa go ba bangwe ka seo se tsuolola ditshwanelo tsa ba bangwe.

O tsweletse ka gore batho ba ba tshelang ka mogare ba na le tshwanelo jaaka mongwe le mongwe.

Mme Doreen Mfaladi wa lephata la pelegi mo kokelong ya Tsabong, o ne a ruta bomme bao ka ditselana tsa go itlhatlhobela mogare, malwetse a dikobo le lenaneo la thibelo ya mogare go tswa mo go mmangwana go ya kwa loseeng ga mmogo le go amusiwa ga bana ke bomme ba ba tshelang ka mogare.

Bao ba ba neng ba tseneletse ithutuntsho, ba ne ba tlhalosa fa ba ne ba sa itse mananeo a mangwe ka bontsi a a amanang le bolwetse jwa AIDS.

Ba re ba lebogela gore ithutuntso eo, e bo e tshwaretswe kwa kgaolong ya bone. Ba re ba itlamile go fetisetsa dithuto tseo kwa go ba bangwe. Bokhutlo

Source : BOPA	Author : Michelle Laba
Location : TSABONG	Event : Ithutuntsho
Date : Feb 06 Wed,201